باجس أبو عطوان ينضم إلى خلية كمال عدوان <<
سرحان <<
لازم تزبط <<
أحيو الأمل بالعمل <<
ليش الحقد ما يثور <<
جيفارا غزة <<
طبخة بحص <<
يا نايمين اصحو <<
لما الشعب يهدر <<
لبنان جديد <<
كيف راح تزبط <<
.
.
أعلى الصفحة
باجس ابو عطوان ينضم
الى خلية كمال عدواندخل عابساً كعادته، ولكنه كان مكفهر الوجه، اقترب وسأل بعصبية :
– شفت رسالة باجس ؟
نظرت اليه، رأيت في عينيه حناناً ممزوجاً بالغضب والحزن، ذكرني بأول لقاء لي معه بعد الخروج من الاحراش وهو يحدثني عن احمد. سألته :
ماذا في الرسالة ؟.
رفع السماعة، ضغط على جرس التلفون .. الداخلي .
– هات الرسالة … والعدسة .
وفردنا قطعة ورق شفافة مضمخة بزيت الزيتون، تتلوى عليها حروف تشبه بقايا تحرك فصيل من النمل، ناولني العدسة المكبرة وقال :
– اقرأها … وشوف شو رأيك !
وسألت نفسي وانا عاجز عن قراءة الرسالة بالعين المجردة، كيف كتبت؟! .. هل يمكن استعمال العدسة في الكتابة ايضاً .
– شو رأيك ؟
– الله يرحمه ..
– ليس هذا هو المهم .. كلنا رايحين .. من يقود بعده ؟
وعدت الى قراءة الرسالة من جديد. رسالة باجس ابو عطوان التي يخبرنا فيها ان صابر. (علي ابو مليحة) قد استشهد، وان المجموعة تنتظر اوامر القيادة لتعيين المسؤول بعده .
كنت اعرف جيداً ان الاخ كمال عدوان يهتم بكل صغيرة وكبيرة من شؤون الحركة، خصوصاً شؤون الارض المحتلة، ولكنني لم اره يعطي اهتماماً لمسألة كاهتمامه بثوار الجبل.
– يجب ان نطور الظاهرة .. يجب ان … يجب ان … يجب ان نصل اليهم .
– لقد تأمنت وسائل اتصال جديدة وسنحل كل مشاكلهم ..
– هذا لا يكفي .. يجب ان اصل اليهم انا بنفسي، لقد كتبت لهم رسالة .. الا تعتقد ان باجس هو الاقدر على القيادة ..
– لنبلغهم ذلك .
– فكر كيف يمكنني ان اصل اليهم .. هذا موضوع لم اطرحه على احد … انت فقط . نظرت الى قامته الفارعة الممتلئة، وقلت :
– الطريق طويل .. وليس من وسيلة للوصول الا المشي ..
– سأمشي ..
– انت لم تستعد جيداً لذلك .. تذكرمشوارنا لوحده غزة ايام الاحراش …
– سأتمرن كل يوم ساعتين ..
وسأستعيد لياقتي … زي احمد … يجب ان اصل اليهم يجب .. ان الفكرة في رأسي. ولن تخرج منه الا بالوصول اليهم …
ووصل كمال عدوان الى الارض التي احبها روحاً طيبة، كان يحلم بالوصول الى مجموعة باجس ابو عطوان، كان يعشق الجبل، وكان يردد دائماً ان اسعد لحظات حياته النضالية هي الشهور التي قضاها في دبين وعجلون .. لقد وصل كمال الى رحم الارض ليبعث فيها وعد القائد .. ليصافح باجس قبل وصوله .
بسم اللــــــــــــه
بسم الفتح
-1-
الدوالي عيونها بتنط من قلب الكروم تعصر الريح
وتعتق الايام في بواكي ما الها ابواب
شبابيكها بتطل ع بحور مسحوره
ع سدوم وعموره
وما بيسكروا الرعيان من ميه حزن
ولا بغرقوا في الليل
ولا بسألوا في الويل
ويظل صوت العاصفه … مواويل ..
تنسج اخيام الحب ع جبال الخليل .
تمطر عليها فرحه من منفى الشمس مره
ومن منفى القمر مره
ومن منفى البحر مرات
ويظل صوت العاصفه حكايات
مرصوفة بدموع الفرح
بتشتي عاكل المنافي فرحه عيون الدوالي
فرحه الرعيان
فرحة اسنين
عرفت اسامي كل لولاد اللي كانوا اصغار
عرفت اسامي كل لولاد اللي ولدوا اجديد
عرفت اسامي كل بطل وشهيد
نسيت ليالي العيد
من يوم ما الارض انسرق كوشانها
وانباع اسمها
والفلاحين تاهو مع الرعيان
وظلوا تايهين
لحتى ما اجاهم باجس ابو عطوان
ومعاه صوت العاصفه
ودلهم ع طريق الارض
وعالكوشان
علمهم الطخ …
وو رجاهم النيشان
من يومها صارت صبايا دورا والعروب
غنيوة امل معجونة بالاصرار
(يا صهيوني يا غدار
جاييلك ابو شنار
(صهيوني سلم حالك طلوا الشجعان معهم السبع باجس ابو عطوان)
(غني يا كلاشن غني وازرع مووايل يا ارفيق باجس حامي الخليل )
وجبالنا حكايات
وايدين ممدودة بالبارود
نجده لغزة من الخليل
وطويلة … بتغطي الجليل
وبتزرع المواويل
وبتمشي عالشط الفلسطيني
من رفح .. للراس
وبتخلي السمك والموج يغنوا مع الثوار
” بسم الله،بسم الفتح
بسم الثورة الشعبية،
بسم الدم، بسم الجرح
اللي بينزف حريه
بسمك بسمك يا فلسطين
اعلناها للملايين …
عاصفة .. عاصفة .. عاصفة “
صابر بطل
مـــــــا مــــات
-2-
الدوالي ممددة فوق السنابل
والزتون … والتين اتبنجوا
وكل الشباب …
كان الحزن في عيونهم
كان الامل مهزوز
كان الخوف، والوحدة زي لسياج
الراعي . والحجار .. والفلاح .. والاستاذ
وسنين ذل امسفطه في ادراج
مفاتيحها ضاعت
وتنهدت لعيون وهيه بتعد
بارودتين
خمسين فشكه
وقنبله
وساموبال
وكلاشين مشدود على ازناده
صباغ شهيد
وشوية مصاري
وجبال مفروشه دوالي
وحكايات … ومواعيد
والخوف بدو يطل … ويسود
لولا صوت .. فز من بين الشباب
صوت باجس ابو عطوان
حركي … “ابو شنار ”
سحب لكلاشن من ايد الشهيد
وقال …
صابر بطل مامات
والدرب لسه في اوله
واحنا اللي لازم نمشي في المشوار
حتى النصر.
المستحيل احنا اللي لازم نعمله
زي ما اتعاهدنا زمان
وايد صابر مزروعه جوه جلودنا
ما تنسى القسم بالثوره حتى النصر
هاتوا الايادي .
جددوا العهد ومعي غنوا …
“بسم الله، بسم الفتح
بسم الثورة الشعبية”
يا ما أحن ترابها
فلســـــــــــــــــــــــــــــــــــــطين
-3-
ليش الفرح ما بيزرعه الا الحزين
والجوع ناره الفقر … لما يثور
والشبعان ع فراشه مستني السلاسل
والجبل مزروع . جوع .. ورجال .. وقنابل
باجس ابو عطوان .
من “الطبقة” اللي ما شتيت عليها الشمس
حزمة ضو
من يوم ما هربت جيوش التاج
صارت شمس
صارت فلك بيدور بين السنابل
يحقن الطين .. والحور بريحة “فتح”
ويحولها صخر صوان
حواليه زنود ولدت في عتمة برد
وما عرفت تمد الايد
لا على البارود
ساعة حنان .. تنمد
تلعب في شعر لولاد .. لصغار
تحلم يصيروا كبار
تيكملوا المشوار
تحلم يشوفوا اليوم اللي الزنود السمر
تحضن تراب الارض وتخلي البحر اخضر
لما الفرج يكبر
لما الشمس تسهر مع الرعيان
وتسمع الخراريف
عن القسام .. وابو ديه … وشريف
وكمال …
وصابر …
صابر … اللي ما صبر يوم
من غير ما يفش غله .
وما نسي انه الطريق اطويل
اللي مع الرعيان
كان ينسج الالحان والمواويل
واللي قال .. زمان …
اسمع يا ابو شنار
لا تقسى عالاخوان بره الارض
الله يساعدهم …
احنا هنا النا عدو واحد
ورجلينا يتحملها صخر جبالنا
ويا ما أحن اترابها فلسطين
وخوانا ما اكثر الاعدا حواليهم
من السما .. ومن بين رجليهم
ايدين تحضنهم … وتطعنهم
ولسان يمدحهم … ويذبحهم
ما اصعب الايمان في المنفى مع الحرمان
شقوا الجبال .. “وفلسطو” الدنيا
وداسوا على ايلول
واتعربشوا الجبال اللي ما توصلها الشمس
راح نصبغ الدنيا بلون اترابنا
ونخلي صوت العاصفه مزروع فوق اجبالنا
زي الزتون .. والتين
حتى تلوح الشمس .. ويموت الفقر والجوع
وتنور البساتين
وتشعشع الحرية عالدنيا من فلسطين .
الدرب لفلسطين
بالتنشــــــــــــــــــــــــــين
-4-
ما في شعب ناضل بجد وما انتصر
حرب الشعب هيه اللي بتصنع القدر
امريكا في الفيتنام فرخه دايخه
وهيه اللي عامله ديك عاكل البشر
غنوا معي يا رجال
خلو الجبل يرقص على الموال
دلت نجوم الحب النا اشعورها
ونضوي كل كهوفنا … وصخورنا
اتعربشوا تانقطف النجمات
وقلوبنا
ونزرع سمانا بالامل
ايدين كل الشعب ممدوده
والايد اللي فاضيه نجسه
ما بتطهر الايد الا يوم ما تنشد ع باروده
لولاد طلعوا اليوم من لصفوف ع الساحه
وقفوا مع الثوار
وبو شنار
علمهم نشيد العاصفه
وذكرهم انه الدرب لفلسطين
بالتنشين
وانه العلم هوه اللي يورجينا الدرب
مش بالشهايد .. بالعمل لجل الشعب
لشهاده بدها حيط تتعلق عليه
والحيط ما بيجيش الا بالحرب
وتحوطت (دورا) بدبابات
وجنود تيصيدوا البطل
لكن . وين .. طار
فوق جناح مرصوف بقلوب لصغار
ولكبار
ورجع الغزو مقهور
واتحوطت (دورا) بالحكايات
وبصوت نشيد العاصفه وموال
ما في شعب ناضل بجد وما انتصر
حرب الشعب هيه اللي بتصيغ القدر
النشامى …
-5-
واتعودت لجبال عاخطوات فيها ريحة الجنه
وايدين رفقتها مع الحساسين
والدنياميت
والزعتر
وعيون بتشوف الالم
مخزون في السوق، وفي المصنع
وتسمع الاهات من الحيطان
وتشم ريحة ايد مغشوشه
وتعرف بانه الارض بالالغام مفروشه
وبتنام فوق الخيش
عين امفتحه
وعين تحلم وين بدها تروح بكره
وشو هدفها .. وليش
مساكين . . .
اللي بناموا عالحرير
ما بيحلموا بنسمة هوا التحرير
اعيونهم بالخوف مرصوفه
وايديهم اللي بتسرق ادموع الغلابى والعرق
واصواتهم المبيوعه للدلال بشوية ورق
بيجي عليها الليل يطويها في حلم وتنحرق
ويظل صوت العاصفه
وباجس ابو عطوان
ورسالة مكتوبة على شعرة (مهى)
اخته مهى .. من عسقلان
وام باجس واقفه
وحواليها ريحه فرحه معجونه بحزن
والناس
مكتومة الانفاس
والدار
دار موسى ابو عطوان …
تستنى الامر …
تفجير …
النار …
هبت على عيون الدوالي
ولعت قلب الخليل
اتفتت الحب وطار
وتمزعت كواشين لعمار
وتولد حقد
وزادت عزوة الثوار
وف ليل ما هو انهار
هبوا النشامى
فزت الحيطان
محموله فوق ازنود سمرا مشلوحه
تحلم بلمسة صخره من راس الجبل
سقفت سماها بالامل
وتشعبطت ع كتاف ريح العاصفه
وحملت مزاريب المطر
صبت دموع الفرحه فوق الطين
وفرشت الحب وغطت سجون الندم بالريش
طارت وهدت همسه ع قلوب البشر
ما في شعب ناضل بجد وما انتصر
يا صهيوني يا غدار
جاييلك ابو شــــــــــــنار
-6-
باجس ابو عطوان
ايدين حره
وقلب شهم
وعين ما بتشوف غير النصر
طافت جبال الشمس
وغطت امواج البحر
بسيوف مصنوعه من شط النهر
وشواهد الشهدا
وحقد الفقر
وفي ناس تعبوا … وراحوا
وناس ولدوا اجديد
والحر ميلاده …
ويوم العيد
يوم ما يحمل سلاحه
وعمر الشهم ساعة ما ناره تقيد
وتطربق الدنيا على اللي دنسوا بلادو
الدنيا بتشتي امل
لما الباروده تغني …
والديناميت يرعد
والعدو يتشقق الدخان في اضلاعه
ويترجى …
بشوية عفو رشوه لباجس
فدوه لصباعه
وزناد باجس غالي خاتم عرسه
وفلسطين مزيونه
ما احلى عروستنا
زين الشباب وزينة الدنيا
موال فرحتنا
يا مهرها
مهما غلى كرمالها يرخص
والعز فوق اتلالها ان مازاد
ما بنقص
غنوا امل معانا يا صبايا دورا والعروب
غنيوة امل معجونة بالاصرار
” يا صهيوني يا غدار
جاييلك ابو شنار ”
غنوا وخلوا اصواتنا بركان
خلوا الشمس تسبح في موج الفرحه
في الطوفان
وف كل همسه جبال مزروعه رعد بتصيح
” صهيوني سلم حالك طلوا الشجعان
معهم السبع باجس ابو عطوان ”
” غني يا كلاشن غني وازرع مواويل
يا ارفيق السبع حامي الخليل”
غني يا شعبي للكرامه بالبترود
من غير حرب الشعب ما تقدر تسود
هيك النشامى دايماً راس الرمح
ابدَمْهُم وبفكرهم يشفوا الجرح
ابطال لما يطلعوا يِهلِّ الصبح
لا الموت يرهبهم ولا غل القيود
غني يا شعبي للكرامه بالبَرود
من غير حرب الشعب ما تقدر تسود
باجس بطل
مـــــا مــــــــــــــــــات
-7-
الارض مزروعه امل
يا مرحبا …
يوم الحصاد املوع قلوب اللي ما تعبوا
وما شققت ايديهم صخور الجبل
الارض للي يحرثوا
الارض للي يزرعوا
ويوم الحصاد
ياما ذياب انيابها تشرخ الريح
لكن فشر
الساعد اللي رافق الديناميت
وبدمه انتصر
ما بينكسر
باجس زرع مشاوير وحكايات
ووصايا للاطفال ..
” مهما الحكي يقصر ومهما يطول ..
ما بينتسى ايلول .. ”
” مهما زرعنا …
الدرب لسه في اوله
وحنكمل المشوار ”
” ان غاب صابر كلنا صبار
وان غاب باجس كلكم احرار ”
” النا الجبل والريح .. وان قل العدد
كل الشعب النا سند ”
” مشاويرنا هزات في دم العدو
سرطان عمره، انتو يا ثوار ..
لازم تحقدوا
عاللي سرق لمسة حنان الام .. والاب
خلانا ايتام الجبل
النا الجبل .. والريح
النا الدوالي ممدودة فوق السنابل
وحنا قنابل
وعلينا بتشتي القنابل ”
. . .
. . .
وتهدلت لعيون وهيه بتعد
بارودتين
عشرين فشكه مبرده
وساموبال
وكلاشن
وصباع باجس مشدوده على زناده
وشوية مصاري
وجبال مفروشه دوالي
وحكايات ومواعيد
والخوف بدو يطل ويسود
لولا صوت فز من بين الشباب
صوت ” . . . . . . . . .”
سحب لكلاشن من ايد الشهيد
وقال
باجس بطل مامات
الدرب لسه في اوله
هاتوا الايادي
جددوا العهد ومعي غنوا
” بسم الله بسم الفتح
بسم الثورة الشعبية
بسم الدم بسم الجرح
اللي بينزف حريه
بسمك بسمك يا فلسطين
اعلناها للملايين
عاصفة . عاصفة . عاصفة “
آب 1974
سرحان
” هو سرحان العلي من عرب الصقر الذي نسف ماسورة البترول في ثورة 1936 الفلسطينية ضد الاستعمار البريطاني والصهيونية العالمية “.
توفيق زياد
” استخدمت هذه الحكاية الشعبية كخلفية صوتية لفيلم “سرحان والماسورة” من انتاج وحدة الشهيد عز الدين الجمل. وقد اعتمد الفيلم والحكاية على قصيدة سرحان والماسورة لتوفيق زياد” .
صخر
كيف انطلق سرحان
-1-
كان يا مكان
مثل الصقر
وعيونه بتنقط جمر
داعس ع صدر الشوك
وملفلف ابثوب المطر
سرحان
كان يا ما كان
وعيونه بتدور عليها الشمس
والليل انطمس
لما مشي سرحان
والريح انطوى
زي العبايه تحت باطه صار
والدرب مستقتل ع خطواته
تيقصر المشوار
بكيت انجوم الليل
لما حر مها الغيم
انها تشوف
كيف اطلق سرحان
كيف انطلق
من غفوته الانسان
الخلاص
-2-
كان يا ما كان
سرحان ماشي
وراسه في سابع سما
امحوط بأفكار .. وبنار
ما بتنطفي
بتشع من بطن الخليج
وتخلي سرحان العلي
لما يشم الذل منها يهيج
وتلف راسه ريحة الصحرا
نفط
ودموع شعب
وجوع
وقصور .. وحريم
وعبيد .. وسجون
وعينك . . . عينك
في عز الظهر
بترول سرحان العلي مسروق
ماشي في شرايينه
يمرق ولا يسأل
ولا يرد السلام . . .
.. عالقدس
ويرجع على جلود الشعب
(نابالم)
سرحان ماشي وفي عينيه
شعلة لهب
وفي جعبته ديناميت
حالف ليكتب قصة الشعب
بقلم توقيت ..
سرحان ماشي
ونظرته عالسهل ممدوده
فارس ودرعه رضا والديه
قمم الجبال صارت ركاب رجليه
وعصا الخيال صارت في ايده باروده
ماشي وعينيه بتلف
يمين .. وشمال
يتحسس الشريان
اللي في قلبه يسحب القطران
والنفط
من سرحان . . . للامريكان
وتمددت قدامه ماسورة نفط
في الحارثيه .. غمضت عينيه
زي اللي شاف ثعبان
السم بينقط من انيابه
ومغروس في قلب الارض
وعينيه يرقص فيهم الطوفان
سرحان مالك .. ليش تبنج
طير
الحية لا تقطع ذنبها
دوس عالراس بالفاس
من غير ما يدوي الرصاص
افهم يا سرحان العلي
من غير ما يدوي الرصاص
ما في خلاص
الفرحه بتدفع ثمن
-3-
كان يا ما كان
زمان ….
لما قالو له وين يا سرحان
صوت الوطن بنده عليك
لبيه
بحلق عينيه وقال :
ونا مالي .. خلوني في حالي
لما قالو له .. ليش يا سرحان
ما بتلحق الاخوان
عا ظهر الجبل
هز كتفه وقال : مش ناقص هبل
لما قالو له .. الشعب والحريه
يا سرحان
قال … ما دام راسي بخير
ما في ضير
ملعون يا سرحان .. افهم
… لسه مش فهمان
يا ويل من يتأخر ابفهمه
يتمرمغ بجهله
ولما نجوم الظهر ترقص في عينيه
والشوك والبسطار ياكلو جسمه
يجيه فهمه
ويومها سرحان العلي فهم اللعبه
وفْسَمعُه هتف صوت الكرامه
يصيح
يا اهل البطر حسو بلاش تتبهرجوا
سواح عالثوار عم تتفرجوا
سهم العدو اعمى ما بيشوف
الطريق
والضربه تيجي في اللي عم بتفرجوا
………………………..
الفرجه بتدفع ثمن
………………………..
…………..سرحان فهم
الصقر لحمه مر
-4-
كان يا ما كان
مرت ايام وشهور
ما حدا شاف سرحان
بس الكل صاروا يعرفوا
سرحان
الكل صاروا يغنوا
سرحان البطل ما هان
لما يدوس الشوك
ع تلالنا بينور الريحان
. . . اشهور .. وشهور ..
وسرحان طاير من مكان لمكان
قال العدو ندفع مصاري ونشتريه
مالقيو حدا يبيعه
والصقر لحمه مر
ان ما شوى نفسه بنار العز
ما في حدا يقدر عليه يشويه
طار الصقر
هدى الصقر
والحيه فوق اتلالنا بتموج
ماسورة نفط
من قلبنا بتمص كل الدم
وما ينوبنا من انيابها
غير السم
سرحان يا سرحان
وينك يا شهم
الموت ما بيصعب على عاشق
حياه
وعينيك فيها النور
ان ما قطعت الراس
ان ما ارتفع صوتك وعبى الناس
ع حب الارض
راح الوطن ينداس
سرحان يا سرحان
ما فيه ماسورة نفط توقف سد
بينك وبين المجد
داس ع صدر الشوك
-5-
كان يا ما كان
ماشي السبع سرحان
وعيونه بتشعلل لهب
ولسانه صار افتيل مغروس
في حزمة الديناميت
في قلبه حب للارض
للبندقية اللي اشتراها من لُقَم لولاد
وف قلبه حقد
عاللي اغتصب ارضه وداس عرضه
ونهب لبلاد
داعس عصدر الشوك وقلبه يهتف للفرح
استني يا حيه
ما دام حراسك بيدنسوا اتراب حطين
والقدس وبيمصوا دمنا
مادام عمري بينحسب
ساعه ما بتموتي
اتفجري … موتي
اتفجري … موتي
مش راح نركع
-6-
كان يا ما كان
ما عاد سرحان العلي
ما حد شافه بعدها
زي الحلم بجناح فوق الريح
طار
واختار درب اوسيع تيكمل المشوار
ويومها .. طلعت جرايد فيها ريحة
كاز
وحروفها مصفوفة ع الوحة
\حقد ع الشعب
اتفجرت .. الله يرحمها
ماسورة البترول
فجرها ارهابي عميل مخبول
ما في اثر غير لذراع يسراوي
مشدود ع باروده خشبها محترق
وهويه محروقه عليها اسم .
سرحان العلي
وايش باقية الخبر ؟
ايش الخبر … !
… عين الشمس اتغيب
… وتطلع
مكسوفه من يوم المدفع
ما خرس وعشش فيه البوم\
ركعوا الزعما يا عيب الشوم
خلوا الارض دموعها تعوم
ذلوها وجباههم فيها تلم الوحل
اتخلي الشعب يبات محروم
يرفع راسه
ويضرب فاسه
في ارضه الحره
ويزرع ثوره
ويجني النصر
اللي الشمس بتعمي بصره
يحب الليل
واللي ركعوا ونسوا السيل
يخافوا الويل
واللي تعبوا ويئسوا يشوفوا
البر الحر
ولسه في ايدهم دفه
وعاملين زفه
اشرف الهم ايدوبوا ..
ايغيبوا في اول جحر
واللي كسر اسنان المدفع
لازم يدفع ثمن الصمت
سكت المدفع .. ركعوا الساده
لكن احنا الثوره الحره
مش راح نركع
….
ركعوا الساده وباسوا الارض
وداسو العرض
وصلُّوا السُنه قبل الفرض
لكن وين .. !
وشوش ربه ابليس العصر
وقال له كلام
اوعى تصدق ركعة حاكم
عنده نظام
راس الثوره لازم يخضع
وان ما ركعت ما في سلام
ركعة حاكم ؟!
مين راح يضمن
بعديها ما تصبح فيتنام
تطلع بكره تشن الحرب
عايزين ركعه حرب الشعب
… فشر ابليس ..
الشعب الثائر مش راح يركع
ولازم يبيد
اللي ركعوا وصاروا عبيد
ركعوا وذلوا ولسه زعامه
نسيوا تاريخنا
كله كرامه وكله نضال
اللي ركعوا راح ينداسوا
مش راح يشمخ مهما الاحدب
يرفع راسه
كاس الذل ما يسقي النصر
وركعة ساعه .. ذلة عصر
وشعب الثورة مش راح يركع
بدمه يخلي العالم يسمع
صوت المدفع
بعزمه يخلي العربي يرفع
راسه ويطلع
زي السهم الحر ويدفع
ثمن العزه والحريه
النا النصر ميه الميه
مش راح نركع
معكم بنادق .. تقدروا تتكلموا
-7-
كان يا ما كان
سرحان زي الجبل شامخ
ما ركع يوم ولا ذل
ناضل ناضل وما مل
وعيونه صوتها ناي بتغنيله
غنيوة حنان .. سرحان
سرحان هاللي راح
مرفوع راسه وعطره فوق الشمس فاح
شيعوا لولاد عمه تايجو له
بالطبول وبالزمور
خبروهم انه عاد
بعد ما وفى بعهده والنذور
بالهنا كل الهنا يا هنيه
وانكوت عيني انا يا صبيه
شيعوا لولاد عمه تا يجو له
خبروهم انه لما جاني يوم
والشرر طاير من اعيونه
عايز التحويشه والاسواره
تا يحمي الوطن ويصونه
بعتله عمري وقد مته هديه
بالهنا كل الهنا يا هنيه\
عمري صار في ايدين سرحان
بندقيه
يا صبايا اليوم عرسه
البسن احلى الثياب
راجع اف كفه النصر زين الشباب
زارع السهل بريحان وورود
والوطن في عينيه صار احلى صبيه
ما يصون الارض يا سرحان
الا البندقيه
والبقيه .. ايش يا ناس البقيه
قوموا ادرسوا التاريخ ومنه اتعلموا
معكم بنادق تقدروا تتكلموا
وان يوم لميتوا السلاح وخبيتوه
راح تندمو وزي الغنم تتلملموا
والبقيه
احنا
كل الشعب
كل الشعب
اصحاب البقيه
والقضيه
ايلول 1973
لازم تزبط
عزم الثائر عمره ما يهبط
يطحن شوك الدنيا بضرسه
ويحرق نفسه
زي الشمعه
والمتردد والمتلخبط والمتشعبط
فوق اكتاف الثوره وحافظ
خط الرجعه
رجل تقدم ورجل تأخر
وبالنسباله الثوره شغله
يمكن تزبط
هيه الثوره فيها يمكن وميمكنشي
ليش اتسد الدرب علينا
ابعد .. صف يمينك امشي
سكه طويله وصعبه وحتماً
لازم تزبط
ياللي انسيت الشعب ودوره
في حرب الشعب
عر موش قلبك تزحف ليش للحل السلمي
ولسانك يهتف للحرب
دم الشهدا دفنته ف جيبك
اخضر تخبط ناشف
تشفط
حاسب … مهلك .. لازم تزبط
وحتتحاسب
حتماً … حتماً لازم تزبط
* * *
بتقول ايش . ؟
حرب الشعب طويله وصعبه
وخايف الناس تموت م الحرب
هيه الناس فيها حد ما ماتشي
يا من الذل
ويا من الجوع
ويا من الضرب
خلي كلابك تاكل حاجه غير الشعب
الحريه بدها حرب
لازم تزبط
ون ما خربت مبتعمرش
وحتما حتماً حرب الشعب
لازم تزبط
* *
بسم غلابى الشعب بتحكي
وبتقول انهم عايزين راحه
وانهم كلوا
وانهم ملوا
وانهم بيقولوها
بصراحه
نظريات الحل السلمي
صرت تقوللي عليها فصاحه
وباسم الشعب اللي دفع دمه
صوت التاجر كله وقاحه
عايزين حل …
عايزين حل … الناس تعبانه
هيه الناس تعبانه من مين ؟!!
من تجار الشعب وعيشته
مش من ثواره الصامدين
صوت الثوره … صوت الشعب
وشعب الثوره عمره ما شح
وحس الفقرا دايماً صح
وعزم الثائر عمره ما يهبط
وصوت عظامه جوه القبر
ثوره ثوره حتى النصر
لازم تزبط
آب 1972
احيوا الامل بالعمل
احيوا الامل بالعمل والموت بالاستشهاد
وامشوا على الدرب
مهما الشوك عصدره زاد
ما دام وجه السنابل في الهوى بيضحك
ما بيطحن الشوك ..
الا خطوة الحصاد
* *
خلوا الكلام للايدين
ينمو الامل في القلب
والخطوه بتروح هدر
لما يضيع الدرب
والايد مع الايد قوه .. تشتي حريه
اما بيصنع النصر
الا ايدين حب الشعب
10 آذار 1973
ليش الحقد ما يثور
ليش الحقد ما يزيد
ما دام الظلم بيفيض
وشعوب مع تاريخها … بتنباع
في سوق العبيد
* *
ليش الحقد ما يثور
ويخلي ايام الكرامه .. تزور
ليل الغلابى
اللي ايديهم والمناجل شققتها الريح
والجوع
وشفافهم تسبح عليها انهور
بتذوب عطشانه
وبتموت … وصوتها مش مسموع
* *
ليش الحقد ما ينفجر بركان
ويغطي كل الارض
اللي على ركبتها صار العرض
ينباع
وعيون الشرف تنهان
الارض اللي قلبها مذبوح
وشطوطها بالنفط والقطران
غرقانه … يسبح في سماها الذل
والاهل … والخلان
ليش الحقد ما يثور
حتى ينولد
في ارضنا الانسان
28 شباط 1973
جيفارا غزة
-1-
الحضاره يا جيفارا في المزاد
وانت صاحي
اللي بيدلل عليها الامريكان
وللي بيزاود عليها الامريكان
وللي عايز يشتريها الامريكان
وانت صاحي
وغزة صاحيه من زمان
كل ما يرسي المزاد .. يطلع جيفارا
ينولد من بسمة عيون العذارى
ايحط روحه في الميزان
يطلع الشاري مع البايع خساره ..
وتبقى انت والحضاره ..
يا جيفارا
-2-
غزة مرشومه معارك
كل حبه رمل فيها الف ثائر
يحمي مشوار (العمصي)
والف (حايك)
والبلاد مرشومه بره
بالمفاوض .. اللي قابض
والمناور .. اللي تاجر
وللي جاهل
يغمس اقلام الدعاره
في قلب محبرة الحضاره
يشنق الكلمه الشريفه
ويسدل الحاضر
على الماضي
ستاره وينسى انه غزه صاحيه
من زمان
وينسى ان الثوره ما بترحم
مفاوض
او مناور
او جبان
تصنع التاريخ
تكتب صفحة الماضي على زنود الغلابى
تنولد عزة سواعدهم حضاره
يا جيفارا
-3-
ياللي رايح … ياللي جاي
غنوا معاي
الكلام اللي جيفارا غزه قاله بالرصاص
النغم اللي عليه يرقص هوا حي الرمال
والزتون .. والسيجاعيه
اللي من طلعة جباليا
طل عالضفة .. وعدى النهر
وزار الجفر
غنى في عمان
طلعت نغمة السامبا عله
ويايديه
يشنق الشمس بحبر غزه عشان
كل يوم الصبح تكتب
انه صاحي
وغزه صاحيه .. من زمان
كل ما يرسي المزاد يطلع جيفارا
ينولد من بسمة عيون العذارى
ايحط روحه في الميزان\
يطلع الشاري مع البايع خساره
وتبقى انت .. والحضاره
يا جيفارا
12 آذار 1973
طبخة بحص
اصوات لا من الريح مصنوعه
ولا من الصخر مقطوعه
ولا من العاصفه فيها اثر
ما فيها ريحة ارضنا
ما فيها ريحة حبنا
ما فيها ومضه من وفا
للي على دمائهم صرنا بشر
صار لنا في الدنيا اسم
بسوى نموت ويكبر الاسم
وشهادة عمرنا كوشان ..
ارض محرره ..
فلسطين
بسوى نغز ابذارنا في الطين
خلي السنابل والسهل
ترقص عانغم حطين
* *
اصوات بتخلي الطرش
ياكل مواسير البنادق
والزناد يصير في التُم زي لسان عطشان
ويحلم بالعطش
اصوات ميه بتغلي .. والصوان
والحرمه ايديها تعد نجوم
وبطون لولاد
زي راس كوبرا يطل منها لسان
لا الجوع راضي
والقدر عالنار فاضي
طبخة بحص
وينك يا سبع الليل
تسمع آهات الارض، والانسان
وينك
* *
طبخة بحص ..
ما في عمر
مادام من غير البنادق … والامل
ما بينحصد حقل السبل
مادام طواحين الهوا
بتطحن هوا
ما في دوا
حتى يغطي الارض دولاب المطر
حتى رموش القدس
تحضن يافا … وطراف البحر
يناير 1974
يا نايمين اصحوا
يا نايمين اصحو على البركان
فاض الحقد وتلهلب الطوفان
والشمس بتشتي غضب
والقدس بتمد الايادي
يا عرب
ما في درب للقدس الا من قلب عمان
يا نايمين اصحوا
نادي على التاريخ يا غافي
لحم العدو من شحمة اكتافي
بترولنا .. نابالهم
وجيوشنا … حراسهم
وين النشامى … وين يا عمان
ابيض قميصك صار يا عثمان
يا نايمين اصحوا
* *
ما في درب للقدس الا بالحرب
ما في حرب الا اذا ثار الشعب
ما في شعب بيثور الا بينتصر
والقيد لازم ينكسر
يا نايمين اصحوا على البركان
لا تحلموا … ما في صلح .. ما في سلام
عمر القنابل ما بيهزمها الكلام
يا نايمين اصحوا
25 شباط 1973
لما الشعب يهدر
لما عواميد الخيم تحكي
والزينكو يطقطق عباب الليل
والجوع بنيانه السمر يشكي
يا ويل تجار الشعب .. يا ويل
يا ويل اللي اتعربشوا
عكتاف ساعات النصر
يا ويل اللي شربوا كاس العز
من دم الفقر
يا ويلهم
لما الشعب يهدر هدر
15 آذار 1973
لبنان جديد
ايدي وايدك تانبني لبنان جديد
اخضر عربي ما فيه لا عبد ولا سيد
ارزاته غنياته ومن دمعاته
فرحة ترسم لمحاته في يوم العيد
* *
لبنان الماضي فاضي ان ما تحول
شمعات تضوي دربه للمستقبل
وحدوده في قلب جدوده ومن اناشيده
عن ملايينه وعن مساكينه ما بيتحول
ايامه الحلوه تضل تشتي مواعيد
ايدي وايدك تانبني لبنان جديد
* *
جربنا لبنان اللي فيه ناس تجوع
وناس متخومه بتكسر كاسات دموع
السكره صارت مره وهبت فكره
ضربت لبنان الحسره وخربت لربوع
ما في بيت الا وضحى قربانه شهيد
ايدي وايدك تانبني لبنان جديد
* *
بتسألني شو هوه ديني شو ايماني
تعلمتا وعرفتا انا لبناني
وعرفتوا اللي وزعنا اللي مزعنا
مش منا لا مش منا هالصهيوني
اصابيعه اللي بتخرب مربوطه بعيد
ايدي وايدك تانبني لبنان جديد
1976
كيف راح تزبط
لازم تزبط
قالو .. كيف ؟
كيف راح تزبط ؟
قلنا الغدر بيصنع ظلم بيولد قهر
قالو القهر بيودي القبر
قلنا القهر بيصرخ .. (لأ)
قالو شفايفنا مقطوعه ..
ممنوعه من قولة (لأ)
قلنا لما اللا بتزم بتنطر دم
بتحشي جراح الغازي سم
بتنسج فوق صخور الدرب حروف النار
بتنقش فوق الريح الثوره … بالاصرار
لازم .. لازم .. لازم بتصير غنيوة ثوار
* *
قالو الايد الوحده ما بتصفق
قلنا الايد الوحده بتقدر تضرب
ولما بتزرع اصبع فوق ازناد المدفع
بتصير جيش
قالو الضعف ما بهزم قوه
قلنا .. لازم
قالو كيف ؟
قلنا الثوره بتبدا نقطه بتصبح نهر
قالو القصه بدها دهر
قلنا القصه بدها صبر
بدها ايمان واصرار
والخطوه بترسم مشوار
والشعله لزغيره في غابة
شعب مكافح تصبح نار
والنقطه اللي بتصنع نهر .. بتصنع بحر
وحق القوة يصبح ضعف
لما قوة حق الشعب بتبدا ..
بيبدا النصر
قالو النصر بعيد بعيد
عاللي يستنى المقادير
وبيهجم عاللي بيطير
فوق جناحات البواريد
قالو يا ما بيتعب ناس
قلنا ياما بيولد ناس
قالو لما النهر بيتعب
بتصير الميه مستنقع
فيه يفقس بيض الحزن
وجناح الباروده بيوقع
قلنا الميه منها الشلال
قالو المستنقع مليان
خوف وتجار واعيان
والبواريد اللي ما وقعت
صارت تحرس في الشيطان
هذا بحمي العهر ..
وهذا ليله ونهاره سكران
صبو الخمره في بوز المدفع
والباروده صارت تدمع
واللي رجله ضاعت ضايع
واللي عنده كرامه صايع
واللي بيفشر صار بيؤمر
واللي بيسرق في من يستر
واللي ما لو عم
خليه يروح ينطم
واللي .. واللي .. قالو .. وزادو .. وعادو
المستنقع مليان
قلنا المستنقع في الثوره …
بدو ثوره ..
والطغيان …
بدو زنود الشمس الحره ..
اللي ما بترضى تنباع ..
لا بالسهره .. ولا بالسكره
ولا بالعم .. ولا بالخال
اللي بتصنع المستنقع
هيه اللي بتصنع شلال
قالو المستنقع مليان
قلنا من المستنقع بطلع ..
ثوره في الثوره … طوفان
يناير 1978